Pesë familje në Vogovë kanë mbetur pa rrugë të shtruar, ndërsa Komuna e Gjakovës ka asfaltuar së fundmi një rrugë qorre pranë pronave të Rexhë Rexhës dhe familjarëve të tij.
Rexha, ish-zyrtar komunal në pension, është angazhuar nga komuna si ekspert i jashtëm me titullin menaxher i projekteve. Në përgjigje me shkrim, ai pranoi se zotëron një parcelë prej 40 ari, me numër kadastral 571-1.
Në një bisedë telefonike, Rexha mohoi se kishte prona në atë lokacion: «S’është e vërtetë. S’është e vërtetë hiç veç ja futni kot!» Më pas, në përgjigjen me shkrim, ai tha: «Rruga në fjalë kalon nëpër prona publike dhe lidhet me Kishën Katolike».
“S’është e vërtetë. S’është e vërtetë hiç veç ja futni kot!”
Në Gjeoportalin e Agjencisë Kadastrale të Kosovës figurojnë parcelat që Rexha i lidh me pronësinë e tij, si dhe bashkëpronarë të tjerë. Në disa prona ngjitur ai figuron bashkëpronar me familjarë.
Ganiu, vëllai i Rexhës, tha se secili prej tyre ka nga 40 ari në atë zonë, ndërsa pjesët e tjera u përkasin xhaxhallarëve të tyre. Nuk është konfirmuar nëse asfaltimi i rrugës është bërë për t’u shërbyer pronave të Rexhës ose familjarëve të tij.
