Drejtori ekzekutiv i Asociacionit të Komunave të Kosovës (AKK), Sazan Ibrahimi, tha të dielën se pjesa e komunave në buxhetin e planifikuar për 2027 pritet të bjerë në 21,3 për qind, nga 21,7 për qind më 2026.
Qeveria miratoi më 2 nëntor projektbuxhetin për vitin 2027, në vlerë prej 4,27 miliardë eurosh. Prej tyre, 908 milionë euro janë planifikuar për komunat.
«Buxheti si shumë monetare ka rritje, mirëpo përqindja e cila ndahet për komuna nga buxheti total i Kosovës ka zbritje», tha Ibrahimi. Ai kërkoi që Kuvendi, gjatë shqyrtimit të projektbuxhetit, t’i marrë parasysh nevojat financiare të komunave.
“Buxheti si shumë monetare ka rritje, mirëpo përqindja e cila ndahet për komuna nga buxheti total i Kosovës ka zbritje.”
Sipas Ibrahimit, vendimet gjyqësore, kryesisht për kontrata kolektive, u kanë marrë komunave rreth 100 milionë euro gjatë këtij viti. Ai kërkoi që niveli qendror t’i kompensojë këto mjete. Shifrat e ndarjes buxhetore dhe të mjeteve nga vendimet gjyqësore nuk janë të mbështetura në dokumente zyrtare.
Ibrahimi tha se AKK-ja i ka kërkuar kryeministrit Albin Kurti takim me bordin, por nuk ka marrë përgjigje. Sipas tij, takimi i fundit mes tyre u mbajt në tetor 2024.
