Qendra për Punë Sociale (QPS) në Kamenicë tha se ishte në dijeni për raportimin e dhunës në familje para se foshnja t’i besohej babait dhe familjes së tij.
Sipas QPS-së, Policia e kishte raportuar rastin më 10 prill 2026. Nëna kishte qenë në kontakt me institucionin si viktimë e dhunës në familje dhe kishte kërkuar urdhër mbrojtjeje.
Prindërit ishin ndarë gjatë shtatzënisë, pas mosmarrëveshjeve. Më 31 korrik, ditën e lindjes së foshnjës, nëna kishte thënë se nuk dëshironte ta merrte në përkujdesje. Ajo nuk kishte kërkuar ta shihte foshnjën dhe ishte pajtuar me emrin e zgjedhur nga babai, sipas QPS-së.
QPS-ja në Gjilan e kishte njoftuar institucionin në Kamenicë se babai kishte pasur probleme me substanca narkotike, ishte trajtuar dhe gjendja e tij ishte përmirësuar. Dy qendrat ishin pajtuar që foshnja t’i besohej babait dhe familjes së tij.
Në kohën kur foshnja iu besua familjes, QPS-ja në Kamenicë nuk e kishte vendimin për urdhrin e mbrojtjes emergjente, tha institucioni. Vendimin e kishte siguruar më vonë.
Për gjendjen psikologjike të babait dhe trajtimin e tij nga profesionistët e shëndetit mendor, QPS-ja tha se nuk kishte informacione të detajuara. Institucioni përmendi mungesën e psikologut dhe numrin e pamjaftueshëm të stafit si vështirësi.
