Pesë kadetë të Forcës së Sigurisë së Kosovës kanë përfunduar studimet trevjeçare në akademitë ushtarake të Gjermanisë, njoftuan të enjten Ministria e Mbrojtjes dhe ministri Ejup Maqedonci.
Ceremonia e diplomimit u mbajt në Ambasadën e Kosovës në Berlin. Në të morën pjesë përfaqësues ushtarakë të Ministrisë Federale të Mbrojtjes dhe të Forcave të Armatosura të Gjermanisë.
Xheto Kelmendi u diplomua në këmbësori, Leutrim Nika në logjistikë dhe Gentri Azemi në IT ushtarake. Lavdim Sylejmani dhe Betim Elshani përfunduan studimet në polici ushtarake.
“Pas diplomimit, ata do t’i bashkohen trupës së oficerëve të Ushtrisë së Kosovës dhe do t’i shërbejnë vendit me njohuritë e përgatitjen e fituar”
«Pas diplomimit, ata do t’i bashkohen trupës së oficerëve të Ushtrisë së Kosovës dhe do t’i shërbejnë vendit me njohuritë e përgatitjen e fituar», tha Maqedonci.
Sipas ministrit, 18 kadetë kanë përfunduar studimet në akademitë ushtarake gjermane, ndërsa 16 të tjerë po studiojnë atje. Mbi 80 pjesëtarë të FSK-së kanë marrë pjesë në trajnime në Gjermani përmes programit Military Training Assistance.
