Ministria e Ekonomisë njoftoi se 30 kompani janë rekomanduar për grante me vlerë rreth 536 mijë euro në fazën e dytë të Skemës së Granteve për Energji të Pastër.
Rezultatet u bënë të ditura më 5 nëntor, në një ngjarje ku morën pjesë Ministria e Ekonomisë, Ministria e Industrisë, Ndërmarrësisë, Tregtisë dhe Inovacionit, KIESA dhe LuxDev. Përmes skemës financohen investime biznesore në burime të ripërtëritshme të energjisë dhe teknologji me efikasitet më të lartë.
Ministrja e Ekonomisë, Artane Rizvanolli, tha se investimet e bizneseve mund të ulin importin e energjisë dhe presionin mbi rrjetin në orët e pikut. «Bizneset tona nuk janë më vetëm konsumatorë të energjisë, ato po bëhen pjesëmarrëse aktive në sistemin e energjisë», tha Rizvanolli.
“Bizneset tona nuk janë më vetëm konsumatorë të energjisë, ato po bëhen pjesëmarrëse aktive në sistemin e energjisë”
Sipas ministrisë, bizneset komerciale dhe industriale përdorin mbi një të tretën e energjisë elektrike në Kosovë. Në thirrjen e parë, 91 aplikime u dorëzuan dhe nëntë kompani morën rreth 120 mijë euro grante për instalimin e sistemeve solare fotovoltaike.
