Prokuroria Themelore në Prizren ka ngritur aktakuzë ndaj E.K. dhe A.K. për fajde, ndërsa E.K. akuzohet edhe për detyrim.
Sipas aktakuzës, E.K. i dha para B.Ç.-së nga viti 2021, duke kërkuar përfitime joproporcionale. Prokuroria thotë se vetëm nga kamatat mori mbi 400 mijë euro. «vetëm në emër të kamatave nga viktima B.Ç., i njëjti merr mbi 400.000 (katërqind mijë) euro», thuhet në njoftimin e Prokurorisë.
Prokuroria pretendon se E.K. e kërcënoi B.Ç.-në që të paguante kamatat dhe të mos e denonconte rastin. Sipas aktakuzës, të pandehurit kërkuan 550 mijë euro, ndërsa E.K. kërkoi 450 mijë euro dhe kalimin e lokaleve e të një shtëpie me vlerë rreth 1 milion euro.
“vetëm në emër të kamatave nga viktima B.Ç., i njëjti merr mbi 400,000 (katërqind mijë) euro”
Më 11 mars 2026, policia i arrestoi të pandehurit kur B.Ç. dhe nëna e tij po shkonin me ta te përmbaruesi privat, para procedurave noteriale për kalimin e pronës, sipas Prokurorisë.
Hetimet janë zgjeruar edhe për pastrim parash. Prokuroria thotë se janë ngrirë disa patundshmëri dhe është propozuar konfiskimi i parave të gatshme, dy automjeteve, akteve noteriale dhe provave të tjera. Fajësia e të pandehurve nuk është përcaktuar nga gjykata.
