Deputetja e LDK-së Hykmete Bajrami kritikoi më 8 nëntor Qeverinë Kurti, duke vënë në pikëpyetje përfundimin e projekteve kapitale dhe planifikimin e investimeve për vitin 2027.
Ajo pretendoi se të papërfunduara mbeten rrugët Prishtinë–Podujevë, Prishtinë–Gjilan, Prishtinë–Mitrovicë, Kijevë–Zahaq dhe Dollc–Gjakovë. «A mund ta përmendni një projekt të madh kapital të përfunduar nga Qeveria Kurti?», shkroi Bajrami.
Duke iu referuar Raportit Nëntëmujor Financiar të Ministrisë së Financave, ajo tha se deri në fund të shtatorit ishin realizuar 376,85 milionë euro nga 998,4 milionë euro të planifikuara për investime kapitale. Sipas saj, 82,11 milionë euro nga shpenzimet e regjistruara si kapitale ishin pagesa për vendime gjyqësore, ndërsa shpenzimet ishin 12,36 milionë euro më të ulëta se në të njëjtën periudhë të vitit 2025.
“Propaganda mund t’i zmadhojë shifrat herë me deklarata e herë në letër, por nuk mund t’i ndërtojë rrugët, shkollat, çerdhet as spitalet”
Për vitin 2027, Bajrami tha se janë planifikuar 1,07 miliardë euro për investime kapitale, përfshirë rreth 247 milionë euro për komunat. Ajo pretendoi se 23 çerdhe në projektbuxhet kanë zero euro të ndara për atë vit, si dhe se gjatë qeverisjes janë lidhur 2.913 kontrata njëburimore.
