Kërkesa për t’i përfshirë dokumentet e Zyrës së Kryeministrit në hetimin parlamentar për vrasjen e Arlinda Zekajt shkaktoi mospajtime mes anëtarëve të komisionit të premten.
Kryetari i komisionit, Burim Ramadani, tha se LVV-ja kundërshtonte dërgimin e kërkesave në këtë zyrë. «Lëvizja Vetëvendosje duket qartë se ka ardhur me një vendim të barrikaduar, me bllokadë me qëndrime të prera», tha ai, duke u kërkuar deputetëve të LVV-së ta rishqyrtojnë qëndrimin deri të hënën.
Deputetja e PDK-së Besa Kabashi-Ramaj shprehu keqardhje që komisioni nuk po i tejkalonte ndasitë politike. «Është e dhimbshme me pa që një komision që po trajton një rast shumë të rëndë dhe duhet që t’i tejkalojë ndasitë politike dhe t’i shërbejë një kauze kombëtare, nuk po arrin me i tejkalu këto ndarje», tha ajo.
“Lëvizja Vetëvendosje duket qartë se ka ardhur me një vendim të barrikaduar, me bllokadë me qëndrime të prera”
Kabashi-Ramaj tha se kishte paraqitur plan për fazat e hetimit dhe se institucionet përgjegjëse duhet të japin llogari para komisionit. Sipas saj, një ministër mund të ketë përgjegjësi morale edhe kur nuk ka përgjegjësi penale.
Deputeti i PDK-së Eman Rrahmani tha se kërkesa për dokumentet duhej të përmbushej. Sipas tij, afati për dorëzimin e tyre ishte 5 nëntori.
