Pas reshjeve të fillimit të nëntorit, në Kosovë pritet përmirësim i përkohshëm i motit nga fundjava, sipas meteorologut Mendim Rugova.
Rugova tha se në ditët e para të muajit janë akumuluar rreth 20 milimetra reshje, afërsisht një e treta e sasisë që pritet për gjithë nëntorin. «Po pritet një përmirësim i përkohshëm i motit», tha ai.
Stuhia që ka ndikuar në rajon po zhvendoset drejt Detit të Zi dhe Rusisë perëndimore. Sipas Rugovës, fusha të presionit të lartë atmosferik që lëvizin nga veriu drejt jugut pritet të ndikojnë në Kosovë nga fundjava.
“Gjatë këtyre ditëve të nëntorit janë rreth 20 milimetra që janë akumuluar në këto ditë të para, një e treta e të reshurave për muajin nëntor.”
Sipas Rugovës, stuhia Agneta, e emërtuar nga Shërbimi Ushtarak Meteorologjik Italian, solli reshje të shumta, veçanërisht në jug të Italisë dhe në Greqi. Ai tha se gjatë javës së ardhshme mund të depërtojë një ciklon nga Atlantiku dhe të tërheqë rryma më të ngrohta drejt rajonit.
