Marta Kos u kërkon fituesve në Serbi reforma për zhbllokimin e fondeve të BE-së

Fituesit e zgjedhjeve në Serbi duhet të rikthejnë besimin e Bashkimit Evropian dhe të zbatojnë reforma për të mundësuar zhbllokimin e fondeve të pezulluara, tha komisionarja evropiane për Zgjerim, Marta Kos.

«Gjëja e parë, dhe për mua shumë e rëndësishme, është ndërtimi i besimit», tha Kos në një intervistë.

Ajo tha se reformat në sundimin e ligjit, pavarësinë e gjyqësorit dhe mediave, si dhe lufta kundër korrupsionit, mund të krijojnë mundësi për zhbllokimin e fondeve të pezulluara nga Komisioni Evropian.

Sipas Kosit, reformat do të ndihmonin edhe në sigurimin e mbështetjes së shteteve anëtare për vazhdimin e negociatave të anëtarësimit të Serbisë në BE.

“Është e nevojshme që Serbia të ndërtojë besim ndaj shteteve anëtare dhe Bashkimit Evropian në përgjithësi, por edhe ne të ndërtojmë besim ndaj qytetarëve të Serbisë.”, tha Marta Kos, komisionare evropiane për Zgjerim.