Platforma “Liria ka Emër” u ka kërkuar të enjten institucioneve evropiane të shqyrtojnë funksionimin dhe standardet e të drejtave të njeriut në Dhomat e Specializuara në Hagë.
Në letër kërkohen një dëgjim parlamentar, një vlerësim të pavarur ndërkombëtar dhe raporte nga Komisioni Evropian e Shërbimi Evropian i Veprimit të Jashtëm. Platforma kërkon edhe takim me përfaqësuesit e saj.
Shqetësimet e ngritura lidhen me kohëzgjatjen e paraburgimit, kufizimet gjatë proceseve dhe mbikëqyrjen e mekanizmave ndërkombëtarë të drejtësisë. Pretendimet për parregullsi procedurale dhe shkelje të të drejtave të njeriut nuk janë verifikuar në mënyrë të pavarur.
“Kjo nuk është një kërkesë kundër drejtësisë. Përkundrazi, është një kërkesë në mbrojtje të saj.”
«Kosova e njeh rëndësinë e drejtësisë ndërkombëtare dhe nuk kërkon të përjashtojë askënd nga përgjegjësia individuale për krimet e provuara», thuhet në deklaratën e platformës. Ajo është shprehur e gatshme t’u ofrojë institucioneve evropiane dokumente dhe materiale që, sipas saj, mbështesin shqetësimet e ngritura.
