Milorad Djokoviqi u dënua me 10 vjet burgim për krime lufte ndaj civilëve shqiptarë në Ozdrim, pas vendimit të Gjykatës Themelore në Prishtinë më 21 tetor.
Sipas aktakuzës, Djokoviqi ishte pjesë e forcave të armatosura serbe që rrethuan dhe sulmuan fshatin, në komunën e Pejës, në maj 1999. Gjatë sulmit u vranë gjashtë civilë shqiptarë dhe u plagosën tre; mbetjet e pesë të vrarëve nuk janë gjetur. Aktakuza thotë se të plagosurit u dërguan në spitalin e Pejës, pastaj u ekzekutuan dhe u varrosën në Lutogllavë.
Grupi ku bënte pjesë Djokoviqi arrestoi rreth 40 civilë, sipas aktakuzës. Dymbëdhjetë u liruan pas tri ditësh pa ushqim e ujë dhe nën torturë; 28 të tjerë u dërguan në burgjet e Pejës dhe Leskovacit dhe u liruan pas ndërhyrjes së Komitetit Ndërkombëtar të Kryqit të Kuq.
“Asnjë dënim nuk mund t’i kthejë jetët e atyre që u morën padrejtësisht.”
Halit Gashi, palë e dëmtuar në rast, kritikoi dënimin pas vendimit. «Asnjë dënim nuk mund t’i kthejë jetët e atyre që u morën padrejtësisht», tha ai. «Nuk e di çfarë dënimi është ky. Është qesharak.»
