Forumi ministror për Drejtësinë dhe Punët e Brendshme mes BE-së dhe Ballkanit Perëndimor është caktuar të nisë më 5 nëntor në Budvë të Malit të Zi; njoftimi irlandez e shoqëron emrin e Kosovës me fusnotë.
Ministri irlandez i Drejtësisë, Punëve të Brendshme dhe Migracionit, Jim O’Callaghan, do ta kryesojë takimin. Ai parashihet të zgjasë dy ditë, me sesione për Punët e Brendshme dhe Drejtësinë.
Pjesëmarrës pritet të jenë ministrat përkatës nga Shqipëria, Bosnjë e Hercegovina, Kosova, Mali i Zi, Maqedonia e Veriut dhe Serbia, si dhe përfaqësues nga Lituania dhe Greqia, shtetet e ardhshme që do të mbajnë presidencën e BE-së.
“Ky përcaktim nuk paragjykon qëndrimet lidhur me statusin dhe është në përputhje me Rezolutën 1244/1999 të Këshillit të Sigurimit të OKB-së dhe Opinionin e Gjykatës Ndërkombëtare të Drejtësisë për shpalljen e pavarësisë së Kosovës”
«Ky përcaktim nuk paragjykon qëndrimet lidhur me statusin dhe është në përputhje me Rezolutën 1244/1999 të Këshillit të Sigurimit të OKB-së dhe Opinionin e Gjykatës Ndërkombëtare të Drejtësisë për shpalljen e pavarësisë së Kosovës», thuhet në njoftimin e Qeverisë irlandeze.
Në sesionin për Punët e Brendshme do të diskutohen krimet në hapësirën digjitale, abuzimi seksual i fëmijëve në internet, migracioni, azili dhe menaxhimi i kufijve. Sesioni për Drejtësinë do të trajtojë luftën kundër korrupsionit.
