Në fjalimin e mbajtur në Kuvend më 5 nëntor, deputeti i PDK-së Arian Tahiri i kërkoi Bashkimit Evropian qëndrim më të qartë për procesin gjyqësor në Hagë.
Ai kërkoi qartësi për standardet e drejtësisë, transparencën dhe respektimin e të drejtave të njeriut në procesin ndaj Hashim Thaçit, Kadri Veselit, Jakup Krasniqit dhe Rexhep Selimit.
«Nuk po ju kërkojmë të mbani anën e askujt, por të drejtësisë», tha Tahiri.
“Gjyqi ndaj tyre nuk ka lidhje me drejtësinë, por me përmbysjen e historisë.”
Fjalimi u mbajt në gjashtëvjetorin e arrestimit të ish-krerëve të UÇK-së. Tahiri e quajti procesin çështje kombëtare, shtetërore dhe historike dhe u bëri thirrje deputetëve për unitet.
