Shpend Ahmeti tha të hënën se politikat ekonomike të Qeverisë po shtojnë varësinë nga importi dhe nuk po krijojnë prodhim e pasuri të re në Kosovë.
Ish-kryetari i Prishtinës argumentoi se rritja e pagave, pensioneve dhe shtesave për fëmijë po shoqërohet me çmime më të larta dhe vështirësi për përballimin e kostos së jetesës. Sipas tij, një pjesë e inflacionit vjen nga jashtë, por ndikojnë edhe politikat vendore dhe mungesa e investimeve në prodhim.
Ahmeti tha se të hyrat shtesë të buxhetit po orientohen kryesisht në ndihma sociale, shtesa dhe paga në sektorin publik, ndërsa shpenzimet për importe dhe energji të importuar nuk po krijojnë prodhim të mjaftueshëm vendor.
“Me thënë shkurt e shqip, ky buxhet dhe këto politika po blejnë qetësi sociale afatshkurtë. Po subvencionojmë importe dhe po i ngrisim çmimet. Nuk po krijojmë kapital dhe pasuri të re brenda shtetit.”
«Po subvencionojmë importe dhe po i ngrisim çmimet. Nuk po krijojmë kapital dhe pasuri të re brenda shtetit», shkroi Ahmeti. Ai paralajmëroi se rritja e kostove të punës pa rritje të produktivitetit mund ta dobësojë konkurrueshmërinë e bizneseve vendore.
