Klinika private Pinea Medical Clinic funksionon në një objekt të lidhur me organizatën “Jetimat e Ballkanit” në kompleksin e Spitalit të Përgjithshëm Rajonal të Gjilanit. Baza juridike e shfrytëzimit dhe kushtet e marrëveshjes mes organizatës dhe klinikës nuk janë publike.
Drejtori i spitalit, Afrim Cana, tha se objekti ndodhet brenda kompleksit dhe ishte ndërtuar para se ai të merrte drejtimin e spitalit. Një përfaqësues drejtues i klinikës konfirmoi se Pinea Medical ka kontratë me organizatën, por refuzoi ta publikonte ose të jepte hollësi.
Përfaqësuesi i klinikës mohoi se objekti është brenda oborrit të spitalit dhe tha se hapësira është e ndarë me rrethojë nga pjesa tjetër e kompleksit. Objekti fillimisht i ishte dhënë organizatës për qëllime humanitare.
Ministria e Shëndetësisë ka thënë se licencimi i institucioneve private shëndetësore rregullohet me Udhëzimin Administrativ Nr. 02/2025. Nuk ka konfirmim zyrtar nëse klinika ka autorizimet dhe licencat përkatëse.
