Edicioni i 15-të i garës rajonale “Balkan Green Ideas” pritet të mbahet në Prizren nga 3 deri më 5 nëntor, me 18 sipërmarrës pjesëmarrës dhe 20 mijë dollarë në çmime.
Balkan Green Foundation (BGF) do ta organizojë aktivitetin në Innovation and Training Park (ITP). Pjesëmarrësit nga gjashtë vende të rajonit do t’i paraqesin idetë e tyre para një jurie ndërkombëtare.
Një ide në kategorinë “Advanced Idea” do të marrë 10 mijë dollarë. Dy ide në kategorinë “Concept Idea” do të shpërblehen me nga 5 mijë dollarë secila, ndërsa fituesit pritet të shpallen më 5 nëntor.
Programi mbështet zhvillimin e ideve të qëndrueshme. Që nga viti 2012, përmes tij janë investuar mbi 500 mijë dollarë në më shumë se 50 ide të gjelbra në rajon.
Gjatë programit treditësh janë paraparë sesione të hapura për publikun dhe diskutime “BGI Talks”. Në to pritet të marrin pjesë përfaqësues nga Helvetas, Agjencia për Financim në Kosovë (AFK) dhe IEDC – Bled School of Management.
Në hapjen e 3 nëntorit janë paraparë fjalime nga ministrja Mimoza Kusari-Lila, drejtori ekzekutiv i BGF-së Dardan Sejdiu dhe drejtori ekzekutiv i Community Development Fund Nermin Mahmuti. Sejdiu tha se 15 edicionet tregojnë se sipërmarrësit në Ballkanin Perëndimor mund të zhvillojnë zgjidhje që përfitojnë mjedisin dhe ekonominë.
