Buxheti i nivelit lokal parashihet të rritet në 908 milionë euro vitin e ardhshëm, por AKK-ja vlerëson se fondet reale jashtë pagave mund të tkurren me rreth 12,6 milionë euro.
Sipas përllogaritjes orientuese të asociacionit, fuqia blerëse e këtyre mjeteve mund të bjerë nga 445,6 milionë euro më 2026 në 433 milionë euro më 2027. Kjo vlen nëse inflacioni vazhdon në nivelin e muajve të fundit dhe rritja e koeficientit të pagave nga korriku mbulohet nga buxheti i paraparë. AKK-ja e vlerëson uljen në 2,8 për qind, me më pak mundësi reale për investime, mirëmbajtje dhe shërbime.
Buxheti komunal parashihet të rritet nga 867,6 milionë euro më 2026, ose 4,66 për qind. Megjithatë, pjesëmarrja e komunave në buxhetin e përgjithshëm të shtetit, sipas AKK-së, pritet të zbresë nga rreth 21,7 për qind në 21,3 për qind. «Pra, komunave u ndahet një pjesë më e vogël e buxhetit të shtetit», tha asociacioni në reagimin e tij.
“Pra, komunave u ndahet një pjesë më e vogël e buxhetit të shtetit”
Drejtori ekzekutiv i AKK-së, Sazan Ibrahimi, tha se inflacioni, rritja e pagave dhe detyrimet nga kontratat kolektive mund t’i zvogëlojnë më tej mundësitë financiare të komunave. Sipas të dhënave të asociacionit, gjatë vitit 2026 janë tërhequr rreth 100 milionë euro nga komunat për ekzekutimin e vendimeve gjyqësore; vazhdimi i tërheqjeve më 2027 do ta ngushtonte më tej hapësirën për investime.
