Zëdhënësi i AAK-së, Kushtrim Xhemaili, pretendoi të shtunën se profile në rrjetet sociale kishin bërë thirrje për vrasjen e Ramush dhe Daut Haradinajt.
Xhemaili tha se dhjetëra profile të rreme kishin shpërndarë shpifje dhe kërcënime. Ai veçoi një llogari me emrin “Besmir Kelmendi”, që, sipas tij, përdor fotografinë e Avni Rrustemit dhe emrin “Avni Rrustemi 2,0”.
«Ky profil ka filluar një fushatë të hapur propaganduese duke bërë thirrje publike për vrasjen e z. Ramush Haradinaj dhe z. Daut Haradinaj», tha Xhemaili.
“Ky profil po tenton të ndërlidhë qëllimisht emrin e familjes Haradinaj me rastin tragjik në Pejë, duke përdorur citate dhe pretendime të rreme të personave të përfshirë në atë ngjarje, me qëllim nxitjen e vetëgjyqësisë dhe akteve vëllavrasëse”
Zëdhënësi tha se AAK-ja ia kishte dorëzuar Policisë së Kosovës të dhënat dhe provat për atë llogari dhe llogari të tjera që, sipas tij, lidhen me të. Policia nuk e ka konfirmuar pranimin e tyre ose nisjen e hetimeve.
Xhemaili tha se fushata në profilin e përmendur kishte vazhduar gjatë 2 ditëve të fundit. Pretendimet për ekzistencën dhe përmbajtjen e llogarive, si dhe për autorët e tyre, nuk janë konfirmuar nga Policia apo ndonjë institucion tjetër.
«Ne do të ndjekim rrugën ligjore deri në fund për secilin individ që fshihet pas këtyre profileve dhe që prodhon apo shpërndan mesazhe të tilla terrorizuese», tha ai.
