Emisari i BE-së për Dialogun Kosovë-Serbi, Peter Sorensen, tha se zbatimi i detyrimeve kryesore të marrëveshjes së vitit 2023 është shumë nën nivelin për të cilin janë zotuar Kosova dhe Serbia.
Sorensen tha se këtë qëndrim ua ka shprehur si Prishtinës, ashtu edhe Beogradit. Ai shtoi se po përpiqet t’i ndihmojë palët t’i kthejnë zotimet në veprime konkrete. «Zbatimi mbetet shumë nën nivelin e asaj për të cilën të dyja palët u zotuan – dhe atë çfarë qytetarët e tyre e meritojnë», tha Sorensen.
Sipas tij, marrëveshjet janë detyruese dhe asnjëra palë nuk duhet të presë që tjetra të veprojë e para. «Asnjëra palë s’duhet ta presë tjetrën», tha emisari.
“Nuk është kënaqësia njësia matëse, por janë rezultatet konkrete.”
Sorensen tha se një takim i nivelit të lartë mes kryeministrit Albin Kurti dhe presidentit të Serbisë, Aleksandar Vuçiq, do të caktohet kur të dy liderët të jenë të gatshëm për rezultate konkrete. Ai nuk dha datë për takimin.
Në intervistë, Sorensen përmendi edhe takimin e parë trepalësh të Komisionit të Përbashkët për Personat e Zhdukur, të mbajtur në fillim të këtij viti. Ai tha se është gjetur gjithashtu një zgjidhje e përkohshme që qytetarët serbë që punojnë ose studiojnë në Kosovë të mund të pajisen me leje pune dhe qëndrimi.
