ShSKUK-ja njoftoi të shtunën se do të procedojë me suspendimin e drejtorit të Spitalit të Përgjithshëm të Mitrovicës, Gëzim Berishës, pas konfirmimit të ndalimit të tij.
Shërbimi tha se masën do ta ndërmarrë në përputhje me ligjin. Nuk u bë e ditur nëse suspendimi është zbatuar tashmë. Po ashtu, nuk janë dhënë detaje për kohëzgjatjen e ndalimit, akuzat formale apo vendimin e organeve të drejtësisë.
«Askush nuk është mbi ligjin», thuhet në njoftimin e ShSKUK-së. Institucioni shtoi se do të sigurojë vazhdimësinë e udhëheqjes dhe funksionimin normal të spitalit.
“Askush nuk është mbi ligjin.”
Gazetarja Endrita Bajrami tha se bashkëshortja e Berishës kishte raportuar dhunë të vazhdueshme psikike dhe se ata nuk bashkëjetojnë prej disa muajsh. «Viktima, bashkëshortja e drejtorit, ka raportuar se vazhdimisht ka pasur dhunë psikike, ndonëse nuk bashkëjeton me të tash e disa muaj…», tha Bajrami.
Ministri i Shëndetësisë, Arben Vitia, tha se ishte informuar për rastin rrugës për në mbledhjen e Këshillit të Përgjithshëm të Vetëvendosjes dhe kishte kontaktuar anëtarët e Bordit të ShSKUK-së. «Këto janë raste të cilat nuk do të tolerohen në asnjë mënyrë nga asnjë punëtor shëndetësor», tha Vitia.
