Protesta për vrasjen e Arlinda Zekajt u mbajt të martën, më 3 nëntor, në sheshin “Zahir Pajaziti” në Prishtinë. Tubimi i organizuar nga Kolektivi për Mendim dhe Veprim Feminist shënoi ditën e shtatë radhazi të protestave.
Protestuesit kërkuan që femicidi të trajtohet si urgjencë kombëtare. Ata kërkuan edhe shkarkimin e ministres së Drejtësisë, Donika Gërvalla, dhe ministrit të Punëve të Brendshme, Xhelal Sveçla.
Një tjetër kërkesë ishte hetimi dhe ndjekja penale e zyrtarëve që dyshohet se e neglizhuan rastin. Protesta u mbajt pas vrasjes së Zekajt më 25 tetor në Vitomiricë të Pejës.
“Sot e nesër edhe më shumë! Çdo ditë në ora 17:00 te sheshi Zahir Pajaziti”
Marshime në kërkim të drejtësisë për Zekajn janë mbajtur edhe në Pejë, Mitrovicë, Ferizaj dhe Istog.
