Prokuroritë e Kosovës ngritën 48 aktakuza ndaj 58 personave dhe ndaluan 11 persona, sipas raportit 24-orësh të Prokurorit të Shtetit.
Gjatë periudhës së raportuar u paraqitën 7 kërkesa për caktimin e paraburgimit ndaj 9 personave. Nuk pati bastisje apo sekuestrime. Prokuroria Speciale ndaloi 3 persona të dyshuar për mashtrim, hyrje të paautorizuar kompjuterike dhe pjesëmarrje ose organizim të grupit kriminal.
Prokuroria Themelore në Prishtinë ngriti 10 aktakuza ndaj 14 personave dhe ndaloi 4 të tjerë. Ajo kërkoi paraburgim për një të mitur, të dyshuar për posedim narkotikësh, armëmbajtje pa leje dhe kanosje. Në Prizren u ngritën 23 aktakuza ndaj 27 personave dhe u ndalua një person për pengim të personit zyrtar.
Në Pejë u paraqitën 4 kërkesa për paraburgim ndaj 6 personave, përfshirë raste të grabitjes, sulmit seksual, materialeve të keqpërdorimit të fëmijëve dhe dhunës në familje. Prokuroria ngriti edhe një aktakuzë për shitblerje të paautorizuar të narkotikëve. Në Gjilan u ngritën 3 aktakuza ndaj 3 personave, u ndalua një person për dhunë në familje dhe u kërkua paraburgim për mashtrim.
Prokuroria në Gjakovë ndaloi 2 persona. Ajo në Mitrovicë ngriti 3 aktakuza ndaj 3 personave, ndërsa prokuroria në Ferizaj ngriti 4 aktakuza ndaj 5 personave dhe kërkoi paraburgim për një rast të dhunës në familje.
