Policia po heton si vdekje të dyshimtë rastin e një burri dhe një foshnje, të gjetur pa shenja jete në një shtëpi në Demiraj të Gjilanit.
Policia pranoi informacionin më 1 nëntor, rreth orës 08:47. Sipas zëdhënësit të Policisë për rajonin e Gjilanit, Ismet Hashani, burri ishte i lindur më 1999. Policia nuk ka dhënë të dhëna për identitetin e tij ose gjininë e foshnjës.
Në vendngjarje shkuan njësitet policore, Prokurori i Shtetit dhe ekipi emergjent mjekësor. Mjeku kujdestar konstatoi se të dy personat nuk kishin shenja jete.
“Me urgjencë në vendin e ngjarjes kanë dalë njësitet përkatëse policore, Prokurori i Shtetit dhe ekipi emergjent mjekësor, ku nga mjeku kujdestar është konstatuar se të dy personat janë pa shenja jete”
«Me urgjencë në vendin e ngjarjes kanë dalë njësitet përkatëse policore, Prokurori i Shtetit dhe ekipi emergjent mjekësor, ku nga mjeku kujdestar është konstatuar se të dy personat janë pa shenja jete», tha Hashani.
Ai tha se rasti është cilësuar si “Vdekje e dyshimtë” dhe se po ndërmerren veprime hetimore për sqarimin e rrethanave. «Në koordinim me Prokurorin e Shtetit janë duke u ndërmarrë të gjitha veprimet e nevojshme operative dhe hetimore për ndriçimin dhe sqarimin e plotë të rrethanave të rastit», tha Hashani.
Me vendim të Prokurorit të Shtetit, trupat do të dërgoheshin në Institutin e Mjekësisë Ligjore në Prishtinë për obduksion. Shkaku dhe rrethanat e vdekjes nuk janë bërë të ditura.
