Analizat e ADN-së kanë konfirmuar identitetin e Adem (Fazli) Ademit, Fatmir (Bajram) Fazliut dhe Ali (Islam) Halitit, pjesëtarë të “Grupit të Intelektualëve”, njoftoi të martën kryeministri Albin Kurti.

Identifikimi u bë nga mbetjet mortore të zhvarrosura në Kalludër dhe Jabukë të Zubin Potokut. Kurti tha se Komisioni Qeveritar për Persona të Zhdukur dhe institucionet përkatëse i kanë njoftuar familjet.

Sipas Kurtit, të tre u rrëmbyen nga forcat e armatosura serbe në prill të vitit 1999 dhe u zhdukën me dhunë. «Ndajmë dhimbjen me familjet dhe u shprehim ngushëllimet më të sinqerta», tha ai.

“Në vijim priten identifikime të tjera, për të cilat do të njoftohen fillimisht familjet përkatëse”
— Agron Limani, kryesues i Komisionit Qeveritar për Persona të Zhdukur.

Gërmimet në Kalludër dhe Jabukë nisën më 28 korrik 2026 dhe zgjatën katër javë. Gjatë tyre u gjetën mbetje mortore që dyshohet se u përkasin të paktën 23 personave.

«Për mua, prej sot përfundon pyetja ‘ku është?’. Tani e di ku e kam», tha Lutfije Ademi Vokshi, motra e Adem Ademit.