Kosova ka regjistruar 242 raste të fruthit nga 16 prilli deri më 26 tetor, ndërsa 18 prej tyre u regjistruan gjatë javës së fundit, tha specialisti i shëndetit publik Faik Hoti.
Hoti tha se shifrat janë pjesë e përditësimit të fundit të Institutit Kombëtar të Shëndetësisë Publike të Kosovës. Rastet e reja paraqiten kryesisht te fëmijët e pavaksinuar.
«Në kuptimin e shifrave të përgjithshme situata është e kontrollueshme», tha Hoti. Ai shtoi se vaksinimi i rregullt kërkon angazhim shtesë dhe se fruthi mund të shkaktojë komplikime serioze.
“Në përditësimin e fundit të Institutit Kombëtar kemi regjistruar 242 raste të fruthit të cilat i takojnë periudhës nga 16 prilli deri me 26 tetor”
Në Klinikën Infektive po trajtoheshin rreth 19 pacientë me fruth të konfirmuar, tha infektologu Lirim Tafilaj. Disa pacientë të tjerë prisnin rezultatet e analizave, ndërsa numri ndryshon sipas vizitave dhe kërkesave për trajtim.
Gjatë gjashtë muajve të fundit janë konfirmuar 83 raste në Prishtinë, 58 në Fushë-Kosovë dhe 25 në Ferizaj. Grupi më i prekur ishte ai i fëmijëve nga 12 deri në 24 muaj, me 93 raste.
