Një instalacion në formë të kromozomit të 21-të është vendosur në shëtitoren «Kej» në Mitrovicën e Jugut, për të nxitur ndërgjegjësimin për sindromën Down dhe përfshirjen e barabartë. Data e saktë e vendosjes nuk është bërë e ditur.
Xhenis Beqiri, menaxher në shoqatën «Down Syndrome Kosova», tha se iniciativa synon t’i nxisë qytetarët të mendojnë për pozitën e personave me aftësi të kufizuara dhe pjesëmarrjen e tyre në shoqëri.
«Prandaj, le të qëndrojë ky kromozom këtu për të qenë pjesë e pasqyrimit dhe prezencës së personave me sindromën Down në Mitrovicën e Jugut», tha Beqiri.
“Prandaj, le të qëndrojë ky kromozom këtu për të qenë pjesë e pasqyrimit dhe prezencës së personave me sindromën Down në Mitrovicën e Jugut”
Sebahate Beqiri, drejtoreshë ekzekutive e shoqatës, kërkoi përkushtim më të madh nga Komuna e Mitrovicës së Jugut, veçanërisht për shërbimet terapeutike dhe sociale. Ajo tha se shoqata ua ofron këto shërbime pa pagesë prindërve, ndonëse ato kanë kosto të lartë.
«Dua të shpresoj dhe po ashtu po besoj, meqenëse prezenca juaj këtu flet shumë, që Komuna e Mitrovicës do t’i trajtojë me prioritet kërkesat e komunitetit me sindromën Down», tha Beqiri.
Ramadan Beshiri, drejtor për Mirëqenie Sociale në komunë, tha se kromozomi është një kujtesë për përgjegjësitë e shoqërisë dhe institucioneve ndaj personave me sindromën Down.
