Mbyllja e institucioneve më 1990 ia ndryshoi rrugën profesionale Iliriana Jaka Gashit, e cila tregoi në podcastin “Rrugëtimi” se si kaloi nga studimet e mjekësisë te puna për fuqizimin e grave.
Drejtoresha e Women for Women ishte e ftuar në episodin e nëntë të podcastit, të drejtuar nga redaktorja Jehona Hulaj. «Përshkrimi i rrugës time me një fjali është që jeta të çon kah nuk e ke mendu», tha ajo.
Kur ishte drejt përfundimit të studimeve për mjekësi, institucionet u mbyllën. «U mbyll fakulteti, u mbyll universiteti, në fakt, u mbyllën të gjitha institucionet», rrëfeu Jaka Gashi.
“Përshkrimi i rrugës time me një fjali është që jeta të çon kah nuk e ke mendu”
Pas luftës, ajo ishte refugjate me dy fëmijë të vegjël dhe u përpoq t’i kthehej profesionit të mjekes. Më vonë punoi në administrimin shëndetësor dhe në projekte zhvillimore, përpara se të merrte drejtimin e organizatës.
Jaka Gashi tha se gjatë 15 viteve të fundit ka pasur përparim në mentalitetin ndaj grave. Sipas saj, ndarja e përgjegjësive familjare mbetet një sfidë.
