Kryetarja e Kuvendit, Albulena Haxhiu, tha në një intervistë në RTK më 2 nëntor se Byroja mund t’i kërkojë gjykatës konfiskimin e pasurisë së pajustifikuar, por nuk mund ta konfiskojë vetë.
«Nëse nuk arsyetohet pasuria, vendos gjykata», tha Haxhiu. Byroja do të shqyrtojë nëse pasuria e zyrtarëve publikë përputhet me të ardhurat e tyre të ligjshme.
Verifikimi mund të nisë nga deklarimet e zyrtarëve, me iniciativë të Byrosë, pas informatave nga institucionet ose pas informatave të palëve të treta, përfshirë qytetarët. Kontrolli mund të përfshijë edhe pasurinë që dyshohet se është bartur te persona të tretë për t’u fshehur.
“Nëse nuk arsyetohet pasuria, vendos gjykata.”
Sipas Haxhiut, ligji do të zbatohet edhe pasi zyrtarët ta përfundojnë mandatin. Ai nuk synon të përfshijë të gjithë qytetarët, por zyrtarët që dyshohet se kanë krijuar pasuri të pajustifikueshme duke keqpërdorur detyrën zyrtare.
Para se ligji t’i dërgohet presidentes për dekretim, duhet të kalojë afati tetëditor. Gjatë kësaj kohe, deputetët dhe palët e tjera të autorizuara mund ta dërgojnë ligjin në Gjykatën Kushtetuese.
Pas hyrjes në fuqi të ligjit, Kuvendi do ta zgjedhë drejtorin e Byrosë. Haxhiu tha se stafi duhet të ketë integritet moral dhe profesional, ndërsa mekanizmi duhet të ketë edhe rol parandalues.
