Përmbajtja e draftit të komunikatës vjetore të Komisionit Evropian për zgjerimin, sipas së cilës Kosova, Serbia dhe Bosnjë e Hercegovina nuk kanë përparuar në fushat themelore, mbetet e pakonfirmuar zyrtarisht.
Fushat themelore përfshijnë sundimin e ligjit, institucionet demokratike, reformën e administratës publike dhe kriteret ekonomike. Sipas draftit, ato ndikojnë në ritmin e përgjithshëm të negociatave për anëtarësim në Bashkimin Evropian.
«Serbia, Bosnje e Hercegovina dhe Kosova nuk kanë shënuar përparim në fushat themelore», thuhet në draftin e komunikatës vjetore të Komisionit Evropian.
“Serbia, Bosnje e Hercegovina dhe Kosova nuk kanë shënuar përparim në fushat themelore”
Dokumenti e cilëson dialogun Kosovë-Serbi si kusht kyç për përparimin drejt BE-së dhe paralajmëron se mungesa e përparimit mund të sjellë kosto politike dhe ekonomike. Për veriun e Kosovës, drafti thotë se situata është e qetë, por e brishtë, dhe se nuk ka përparim drejt themelimit të Asociacionit të komunave me shumicë serbe.
Drafti kërkon konsultime të strukturuara me serbët e Kosovës dhe koordinim më të mirë për hapjen e urës mbi Ibër. Ai gjithashtu vlerëson se Serbia nuk ka ndërmarrë hapa të rëndësishëm për llogaridhënie lidhur me sulmin në Banjskë, në shtator 2023, dhe kritikon lobimin e saj kundër anëtarësimit të Kosovës në organizata ndërkombëtare.
Komisioni Evropian nuk e ka publikuar raportin përfundimtar. Publikimi pritet më 4 nëntor, por data nuk është konfirmuar zyrtarisht dhe nuk dihet nëse përmbajtja e draftit do të ndryshojë.
