Agjencia e Ushqimit dhe Veterinarisë asgjësoi më 29 tetor 5.560 kilogramë misër me origjinë nga Serbia, pasi analizat laboratorike konstatuan aflatoksinë B1 mbi kufijtë maksimalë të lejuar.
Asgjësimi u bë nën mbikëqyrjen e inspektorëve të AUV-së, në tri subjekte ekonomike. Në “Agro Com” Sh.P.K. në Fushë Kosovë u asgjësuan 3.270 kilogramë, në “Thermo-1” Sh.P.K. në Prugoc të Prishtinës 1.040 kilogramë dhe në NTP “Te Hysi” në Shtime 1.250 kilogramë.
AUV-ja ndaloi përdorimin dhe tregtimin e misrit. Agjencia u bëri thirrje fermerëve, prodhuesve dhe tregtarëve të sigurojnë origjinën dhe gjurmueshmërinë e produkteve, si dhe të mos përdorin ose tregtojnë misër me tejkalim të kufijve të aflatoksinës B1.
“Bazuar në rezultatet e analizave laboratorike të kryera në Laboratorin e AUV-së dhe të konfirmuara nga AGES në Austri, është konstatuar se produkti ‘Koncentrat për lopë qumështore’ përmban aflatoksinë B1 në nivel prej 13 mikrogramë/kg, mbi nivelin e lejuar”
«Ministria e Bujqësisë, Pylltarisë dhe Zhvillimit Rural dhe AUV do të vazhdojnë kontrollet zyrtare, analizat laboratorike dhe ndërmarrjen e masave për parandalimin e qarkullimit të produkteve që paraqesin rrezik për shëndetin e njerëzve dhe kafshëve», thuhet në njoftimin e AUV-së.
Aflatoksina B1 mund të kalojë në qumësht përmes ushqimit të kontaminuar për kafshë, duke paraqitur rrezik potencial për shëndetin e konsumatorëve. Nuk është bërë e ditur nëse ndonjë sasi e misrit ishte përdorur ose shitur para ndalimit, apo nëse pati pasoja shëndetësore.
