Një 23-vjeçar nga Unna është arrestuar në Gjermani nën dyshimin për planifikimin e një sulmi, ndërsa një 19-vjeçar nga Hageni po hetohet, por nuk është ndaluar. Autoritetet gjermane nuk i kanë konfirmuar drejtpërdrejt këto të dhëna.
Dy të rinjtë dyshohet se gjatë shtatorit diskutuan për kryerjen e një sulmi dhe sigurimin e armëve. Sipas pretendimeve, ata folën për 2 pushkë automatike AK-47, me çmim të planifikuar prej 1.000 eurosh secila.
Forcat speciale gjermane bastisën banesa në Unna dhe Hagen më 1 tetor, por nuk gjetën armë. Objektivi i mundshëm i sulmit nuk është bërë i ditur.
I arrestuari ndodhet në paraburgim për shkak të rrezikut të arratisjes. 19-vjeçari, i identifikuar si Adnan R. dhe me shtetësi gjermane e kosovare, nuk është dërguar në paraburgim, pasi autoritetet nuk kanë gjetur baza ligjore për këtë masë. Nuk dihet nëse ai është liruar.
Në fazën fillestare të hetimeve u përfshinë edhe 2 shtetas sirianë, 20 dhe 24 vjeç. Ndaj tyre nuk u ngrit akuzë për mungesë provash. Detajet për planin e dyshuar, identitetin e 19-vjeçarit dhe armët nuk janë konfirmuar drejtpërdrejt nga autoritetet gjermane.
